Vladimir Parfyonov
Vladimir Parfyonov ( 1970-yil 17-iyun) — sovet va o‘zbek yengil atletikachisi, nayza uloqtirish bo‘yicha ixtisoslashgan. XXVI yozgi Olimpiya o‘yinlari ishtirokchisi, Osiyo chempionati va Osiyo o‘yinlari sovrindori sanaladi.
Sport faoliyati
1989-yilda Odessada (Ukraina SSR) bo‘lib o‘tgan Butunittifoq musobaqalarida nayza uloqtirishda 74.22 metr natija bilan birinchi o‘rinni egalladi. 1992-yilda Olmaotadagi (Qozog‘iston) xalqaro musobaqalarda birinchi o‘rinni egalladi.
1993-yilda Manilada (Filippin) o‘tkazilgan yengil atletika bo‘yicha Osiyo chempionatida nayza uloqtirishda 77.32 metr natija qayd etib, kumush medalga sazovor bo‘ladi. Biroq Shtutgartda (Germaniya) yengil atletika bo‘yicha o‘tkazilgan jahon chempionatida u omadsiz ishtirok etgani bois saralash bosqichida 70.88 metr natija bilan atigi 38-o‘rinni egalladi.
Vladimir Parfyonov 1994-yilda Xirosimadagi (Yaponiya) yozgi Osiyo o‘yinlarida nayza uloqtirish bahslarida 81.66 metr natija bilan kumush medalni qo‘lga kiritadi. Toshkentda bo‘lib o‘tgan mamlakat chempionatida birinchi o‘rinni egalladi. 1995-yilda u Ispaniyada o‘tkazilgan turnirda birinchi o‘ringa munosib ko‘riladi va Gyoteborgda (Shvesiya) yengil atletika bo‘yicha o‘tkazilgan jahon chempionatida yana ishtiroki muvaffaqiyatsiz bo‘lib, ikkinchi saralash guruhida atigi o‘n uchinchi o‘rinni egalladi .
1996-yilda Atlantadagi (AQSH) Yozgi Olimpiya o‘yinlarida u nayzani 73.96 metrga uloqtiradi va umumiy saralashda atigi 27-o‘rinni egalladi. 1997-yilda Toshkentda birinchi o‘rin sohibi, lekin Afinadagi (Gresiya) jahon chempionatida yana omadsiz chiqish qiladi. Kelgusi yili Olmaotada (Qozog‘iston) “Gusman Kusanov hotirasiga bag‘ishlangan” xalqaro turnirida 74.45 metr natija bilan ikkinchi o‘ringa loyiq qo‘riladi.
2000-yilda Flandriya kubogida (Belgiya) ikkinchi, Belgiya chempionatida birinchi o‘rinni, 2006-yilda Parfyonov Belgiya klublar chempionatida ikkinchi, 2008-yilda uchinchi o‘rinni egalladi. 2016-yilda Belgiya chempionatida uchinchi o‘ringa sazovor bo‘ladi.
Manbalar
uz.wikipedia.org