Lingosteve
Steve Kaufmann (talaffuzi: Stiv Kaufman; 1945-yil 8-oktyabrda tugʻilgan) — kanadalik poliglot. 2023-yilgi hisobga koʻra, turli darajada 20 ta til biladi.
Tarjimai holi
Kaufmann 1945-yilda Shvetsiyada, hozirgi Chexiya Respublikasining Prostejov shahridan boʻlgan yahudiylar oilasida tugʻilgan. Uning ota-onasi chex va nemis tillarida erkin suhbat qura olishgan. Besh yoshida, 1951-yilda, oilasi bilan Monrealga (Kanadaga) koʻchib oʻtadi va shu yerda oʻsib ulgʻayadi. 1962-yilning iyun oyida quruvchilik kasbini tashlab, uni Yevropaga olib ketishi va bu uchun unda ishlab berishi mumkin boʻlgan kema topmoqchi boʻladi. Dastlab, bu ish oson kechmaydi. Uchinchi urinishda unga Kvebek shahrida dengizchisini yoʻqotgan Gerda Schell nemis paroxodidan ish topiladi. Kaufmann Londonga o‘n kundan keyin yetib keladi. U yerda bir hafta davomida boʻlgandan soʻng, Dover nomli paromda Belgiyaning Ostend shahri orqali Fransiyaga yoʻl oladi. Grenoblda bir yil yashagach, L’Institut d'Études Politiques (Siyosiy tadqiqotlar instituti; Sciences Po nomi bilan tanilgan) siyosat boʻyicha oʻqishni davom ettiradi va Parijda fransuz tilini oʻrganadi.
Oʻqishdan soʻng Yevropa boʻylab sayohat qilib, Ispaniya, Italiya va Germaniyada asosiy til koʻnikmalarini egallaydi. Kanada diplomatik xizmati tarkibiga qoʻshilgandan soʻng, 1969-yilda Gonkongda xitoy tilini oʻrganishni boshlaydi. Kunduzi taʼlim olgani hisobiga, darslardan soʻng, mustaqil ravishda, bir yil muddat ichida ushbu tilni ham yaxshi oʻrganadi. U 1970-yillarning boshida Kanadaning Yaponiyadagi elchixonasiga qayta yuborilganida, yapon tilini oʻrganishi kerakligini anglaydi.
Savdo komissari lavozimidan boʻshab, til oʻrganish qobiliyatini tijorat sohasida ishlatgan holda Yaponiyada 9 yil istiqomat qiladi. Keyinchalik, yanada koʻproq tillarni oʻrganishni boshlaydi.
Hozirgi kasbi
Kaufmann konferensiyalarda til oʻrganish texnikasi va qobiliyatlari haqida nutq soʻzlaydi. U, shuningdek, til oʻrganish tajribasi va tavsiya etilgan metodlarni muhokama qiluvchi bir qancha ijtimoiy media kanallarini boshqaradi. Ikkala kasbi ham til oʻrganish texnikasiga va til oʻrganayotganlarga yordam berishga qaratilgan.
U Shimoliy Amerika poliglot simpoziumining asoschilaridan biri hisoblanadi. Kaufmann til oʻrganish uchun sayohat qiladi va dunyoning turli telekanallarida xitoy, rus va ukrain kabi tillarda oʻz ona tilidagidek intervyu beradi. U Huffington Post gazetasining doimiy muallifidir.
Til oʻrganish
Kaufmann 50 yildan ortiq vaqtini tillarni oʻrganishga sarflagan. U oʻquv jarayoniga toʻliq shoʻngʻish tarafdoridir. Matnlarni o‘qish orqali tilni o‘zlashtirishga va notanish so‘zlar haqida ko‘p tashvishlanmaslikka eʼtiborining koʻp qismini qaratadi. Yangi soʻzlar asta-sekin takror o‘qish orqali o‘zlashtiriladi, deb hisoblaydi. U qiyin soʻzlarni yodlash uchun kartochkalardan foydalanishni qoʻllab-quvvatlasa-da, oʻrganish vaqtining koʻp qismi ona tilida soʻzlashuvchilarni tinglash va matnlarni oʻqishga sarflash kerak, deb hisoblaydi. Ayniqsa, o‘rganayotgan tilning mamlakat yoki mintaqa tarixiga oid kitoblarni ona tilida o‘qishni yaxshi ko‘radi. Kaufmann til oʻrganishda qatʼiy kundalik jadvalga ega boʻlmaslikni afzal koʻradi. U boshqa vazifalarni bajarayotganda oʻrganayotgan tilida kontent tinglashni yaxshi koʻradi. Uning taʼkidlashicha, yosh til oʻrganishga toʻsqinlik qilmaydi. Keksalar ham, yoshlar ham til oʻrganishlari mumkin. U, shuningdek, xatolarni oʻquv jarayonining tabiiy qismi sifatida tan oladi va baʼzi xatolarga yoʻl qoʻygan taqdirda ham odamlarni ravon deb hisoblash mumkin, deb hisoblaydi.
Kaufmann 60 yoshida oʻzi uchun 9-til boʻlgan rus tilini oʻrganishni boshlagan. 2023-yil holatiga koʻra, 20 ta tilni biladi, ammo uning bu tillarda gapirish va yozish qobiliyati sezilarli darajada farq qiladi. Uning taʼkidlashicha, oʻrgangan tillarida yozish qobilyati unchalik kuchli emas. Oʻzlashtirilgan tillarni qayta koʻrib chiqish ona tilida soʻzlashuvchi bilan muloqot qilishda dastlab qiyin boʻlishi mumkin. U ingliz tilidan tashqari fransuz, xitoy, kanton, yapon, koreys, rus, shved, nemis, italyan, ispan, portugal, ukrain, chex, slovak va rumin tillarida gaplasha oladi. Kaufmann, shuningdek, yunon va turk tillarini ham o‘rgangan va hozirda arab va fors tillarini o‘rganmoqda. 2023-yildan boshlab turk tilidan soʻng, arab va fors tillarini oʻrganishga eʼtibor qaratishini, vaqtini arab seriallari va Al-Jazeera yangiliklarini tinglash, arab va fors tarixiga oid kitoblarni oʻqish bilan oʻtkazishini taʼkidlagan.
Til oʻzlashtirish boʻyicha taniqli olim Stephen Krashen Kaufmanning til oʻrganishga yondashuvini, shuningdek, Kato Lomb kabi boshqa poliglotlarning yondashuvini oʻrgangan. U Kaufmann va boshqa poliglotlarning muvaffaqiyatini oʻrgana turib, ularning ikkinchi tilni oʻrganish boʻyicha oʻz gʻoyalarini mustaqil qoʻllab-quvvatlashini hamda Kaufmanning yondashuvini boshqa til oʻrganuvchilar uchun namuna sifatida koʻrsatishini taʼkidlaydi. U Kaufmanni „shak-shubhasiz, juda zoʻr“, deya maqtab qoʻygan. Va bunga qoʻshimcha qilib, „U mening til oʻrganish boʻyicha terapevtim. Menga ancha yordami tekkan“, degandi.
Manbalar
uz.wikipedia.org