Khaby Lame
Khabane Lame (talaffuzi: [Xabi Leym]; 2000-yil 9-martda tugʻilgan) - Senegalda tugʻilgan italyan ijtimoiy tarmoq bloggeri. U oʻzining TikTok videolari bilan mashhur boʻlib, videolarida u oʻta murakkab layfxak videolarni masxara qiladi. 2023-yil mart oyi holatiga koʻra, Lame TikTokda eng koʻp obunachiga ega foydalanuvchi hisoblanadi.
Yoshligi
Lame 2000-yil 9-martda Senegalda tugʻilgan. U bir yoshga toʻlganida uning oilasi Italiyaning Chivasso shahridagi davlat tomonidan egalik qilinadigan uy-joy majmuasiga koʻchib oʻtgan. Uning uchta ukasi bor. U oʻn toʻrt yoshga toʻlguniga qadar italyan maktablarida oʻqigan, ota-onasi uni vaqtincha Dakar yaqinidagi Qurʼon maktabiga oʻqishga yuborishga qaror qilgan. Lame 2020-yil mart oyida ishdan boʻshatilgunga qadar Turin yaqinidagi zavodda CNC dastgoh operatori boʻlib ishlagan.
Karyerasi
U COVID-19 pandemiyasi paytida ishdan boʻshatilganidan soʻng, Lame TikTokga videolar yuklay boshlaydi. Uning dastlabki videolarida raqsga tushgani va videooʻyinlar tomosha qilgani koʻrsatilgan. U TikTokning „duet“ va „taqlid“ funksiyalaridan foydalanib ishlagan videolari orqali mashhurlikka erishdi, bunda u murakkab layfxak tasvirlangan videolarga o‘sha vazifani oddiy tarzda, hech narsa demasdan, soʻngra oʻzining odatiy qo‘l ishorasi bilan bajaradi. 2021-yil aprel oyida u TikTokda eng koʻp kuzatuvchiga ega italiyalik, Gianluca Vacchini va keyinchalik Addison Raeni ortda qoldirib, platformada ikkinchi eng koʻp obunachiga ega foydalanuvchiga aylandi. 2021-yil avgust oyida Lame Yuventusning Manuel Locatelli haqidagi e’lonida ishtirok etdi. 2021-yil sentyabr oyida u Venetsiya kinofestivalida Xavier Giannolining „Lost Illusions“ fransuz filmining birinchi namoyishida maxsus mehmon sifatida qatnashdi. 2022-yil yanvar oyida Lame Hugo Boss bilan koʻp yillik hamkorlikni imzoladi va #BeYourOwnBoss kampaniyasida nomi eʼtirof etildi.
2022-yil 22-iyun kuni Lame 142,1 million obunachi bilan Charli DʼAmelioni ortda qoldirib, TikTokning eng koʻp kuzatuvchiga ega ijodkoriga aylandi.
Lame 2023–yilda Italiaʼs Got Talent telekoʻrsatuvida hakamlar aʼzosi etib tayinlandi.
Shaxsiy hayoti
Khaby Lame — musulmon. U 2020-yil oktyabr oyida Zaira Nucci bilan unashtirilganini eʼlon qildi.
Lame bir yoshidan Italiyada yashab kelmoqda va italyan tilini yaxshi biladi. U 2022-yil avgustigacha oʻz agenti bilan Milanda Senegal fuqarosi boʻlib yashagan, Italiya Ichki ishlar vazirligi maslahatchisi Karlo Sibiliya unga fuqarolik berilishini eʼlon qilganidan soʻng Chivassoda Italiya fuqaroligini oldi. Lame oʻzini „har doim itlayan his qilganini“ aytdi va oʻzini shunday taʼriflash uchun „bir parcha qogʻoz kerak emasligini“ ilgari aytgan edi.
Filmografiyasi
Lame Black Panther: Wakanda Forever (2022) filmining italyancha dublyajida ovoz bergan.
Manbalar
Havolalar
uz.wikipedia.org