Jidda

Jidda — Saudiya Arabistonidagi shahar. Aholisi 1,2 mln.dan ziyod kishi (1990-yillar oʻrtalari). Qizil dengiz boʻyidagi port. Xalqaro aeroport bor. Hijoz viloyatining yirik savdo va sanoat markazi. Marmarga ishlov beriladi. Neftni qayta ishlash, neftkimyo, sement, mebel, koʻn poyabzal, toʻqimachilik, oziq-ovqat sanoati korxonalari; poʻlat quyish, ehtiyot qismlardan avtomobil yigʻish va kema remonti, qogʻoz, yogʻ-moy zavodlari bor. Har xil diniy marosim buyumlari tayyorlab sotiladi. Jidda Makka va Madinaga ziyoratga boruvchilar yoʻlidagi tranzit punkt. Universitet (1967) bor. Jidda 1946-yilgacha kichik savdo shahri boʻlgan. Jidda tashqaridan keltiriladigan ichimlik suvi bilan taʼminlangan. Yangi zamonaviy turar joylar, keng koʻchalar, bogʻlar, sanoat inshootlari barpo etilgan. Hoz. vaqtda Jidda mamlakatning diplomatiya ishlari va elchixonalar joylashgan markazi.

Manbalar

uz.wikipedia.org