Jennifer Lawrence

Jennifer Shrader Lawrence (talaffuzi: Jennifer Shreydr Lourens; 15-avgust 1990-yilda tugʻilgan) amerikalik aktrisadir. 2013-yilda Time jurnali tuzgan dunyoning eng nufuzli 100 kishisi roʻyxatiga kiritilgan. Lawrence suratga tushgan filmlar shu kungacha umumjahon boʻylab $6 milliarddan oshiq daromad qilgan.

Lawrence Kentucky shtatining Indian Hills shahrida tavallud topgan. Bolalik chogʻlarida cherkov pyesalari va maktab myuzikllarida turli rollarni ijro etgan. Keyinchalik, oilasi bilan Los Angeles shahriga koʻchib oʻtgan hamda oʻsha paytlarda teleseriallarda suratga tusha boshlagan. The Bill Engvall Show (2007—2009) sitkomida birinchi marta bosh rolni ijro etgan. Garden Party (2008) dramasida ikkinchi darajali rolni oʻynagan. Winter's Bone (2010) mustaqil dramasida jonlantirgan Ree ismli oʻspirin qiz obrazi unga shuhrat keltirgan. Gʻaroyib odamlar filmlar seriyasidagi (2011—2019) Mystique hamda Hayot-mamot oʻyinlari filmlar seriyasidagi (2012—2015) Katniss Everdeen rollari ortidan olamshumul shuhrat qozongan.

Lawrence aktrisa oʻlaroq karyerasi davomida koʻplab nufuzli mukofotlar bilan taqdirlangan. Silver Linings Playbook (2012) romantik filmida jonlantirgan yosh beva ayol roli unga „Eng yaxshi aktrisa“ nominatsiyasida Oscarni olib kelgan va buning ortidan 22 yoshida Oscar bilan taqdirlangan ikkinchi eng yosh aktrisaga aylangan. Shuningdek, American Hustle (2013) qora komediyasidagi Rosalyn Rosenfeld roli ortidan „Eng yaxshi ikkinchi darajali aktrisa“ nominatsiyasida BAFTAga loyiq topilgan. Bundan tashqari, Joy (2015) filmida gavdalantirgan Joy Mangano roli uchun Oltin globusga sohib boʻlgan.

Aktrisalikdan tashqari, Lawrence feministlik bilan shugʻullanadi. 2015-yilda „Boys & Girls Clubs of America“ va „Maxsus olimpiadalar“ tashkilotlarini dastaklovchi Jennifer Lawrence Foundation („Jennifer Lawrence Jamgʻarmasi“) ga asos soldi. 2018-yilda esa Excellent Cadaver nomli produserlik kompaniyasini tuzdi.

Hayoti

Jennifer Shrader Lawrence 1990-yil 15-avgustda AQShdagi Kentucky shtatining Indian Hills shahrida tugʻilgan. Otasi Gary qurilish shirkati egasi boʻlgan, onasi Karen (qizlik familiyasi Koch) esa yozgi oromgohda menejer boʻlgan. Jenniferning Ben va Blaine ismli ikkita akasi bor. U Louisville shahridagi Kammerer oʻrta maktabida tahsil olgan.

Jennifer Lawrence

Hayoti

Filmografiyasi

Film

Televideniye

Musiqiy videolar

Mukofotlari

Manbalar

Havolalar