Javohir Esonqulov

Javohir Esonqulov (1997-yil 20-aprel, Surxondaryo viloyati, Oʻzbekiston) – oʻzbek futbolchisi, hujumchi. 2023-yildan Qrim Muxtor Respublikasining Bogʻchasaroy shahrining „Qiziltosh Bogʻchasaroy“ jamoasi azosi.

Futbolchilik faoliyati

Javohir Esonqulov 1997-yil 20-aprelda Oʻzbekistonning Surxondaryo viloyatida tugʻilgan. 8 yoshida oilasi bilan Rossiyaga, Saratov shahriga koʻchib oʻtdi. 10 yoshida u Saratov Sokolida futbol oʻynay boshladi, 2013-yilgacha ushbu klubning yoshlar jamoasida oʻynadi. Birinchi murabbiy – Sergey Aleksandrovich Podmetalin.

2013-yilda Javohir Esonqulov Oʻzbekistonga qaytib, Zarafshonning „Qizilqum“ klubida mashgʻulotlarida qatnashgan, ammo shartnoma imzolamagan. Shundan soʻng 3 oy davomida Qarshining „Nasaf“ jamoasi yigʻinida ishtirok etgan boʻlsada, bu safar ham jamoagaqabul qilinmadi. Qarshi klubidagi omadsizlikdan soʻng Javohir Surxondaryoga qaytib, individual mashgʻulotlar olib bordi, baʼzan mahalla jamoalari tarkibida futbol oʻynadi. 2014-yilda Toshkentning „Bunyodkor“ jamoasiga azo boʻldi. Avvaliga „Bunyodkor-2“ klubida, keyinroq „qaldirgʻochlar“ yoshlar jamoasida oʻynadi. 2016-yil boshida esa Bekobodning „Metallurg“ klubiga ijaraga berilgandi.

2019-yilgi mavsumni Qoʻqon 1912 jamoasida boshladi. 2019-yilgi mavsumda „Lokomotiv“ jamoasi bilan shartnoma imzoladi. 2020-yilgi mavsumni Qarshining „Nasaf“ klubida oʻtkazdi. 2021-yilda Termizning „Surxon“ klubi bilan shartnoma imzoladi. 2022-yil Qozogʻistonning „Kiran“ klubi bilan shartnoma imzoladi. 2023-yilgi mavsumda Qrimning „Qiziltosh Bohchasaroy“ klubi bilan shartnoma imzoladi.

Terma jamoa

2015-yilda Oʻzbekiston yoshlar terma jamoasi yigʻinida ishtirok etgan, biroq hali birorta ham oʻyin oʻtkazmagan.

Manbalar

Havolalar

uz.wikipedia.org