Islombek Arslonbekov
Islombek Arslonbekov (1901 — 1938) — Andijon shahar partiya komiteti sekretari.
Islombek Arslonbekov 1901-yil Andijonda ishchi oilasida tugʻilgan.
1920-yildan boshlab partiya aʼzosi, partiya bileti raqami: 2737523, 1371751. 1910-1914-yillarda Andijondagi b oshlangʻich maktabda tahsil olgan. 1919-yildan boshlab oʻqishini harbiy maktabda davom ettiradi. Bu yerdagi taʼlim 6 oy davom etgan. 1927—1928-yillarda Toshkentdagi Oʻrta Osiyo Kommunistik universitetida tahsil olgan.
1915-1918-yillarda Toshkentning boylaridan boʻlgan, Burdajar nomli pivo zavodi egasi Bukovskiy qoʻlida oddiy ishchi sifatida ishlagan. 1919—1921-yillar orasida Qizil armiyaga chaqirilgan va armiya saflarida xizmat qilgan. 1921-1923-yillarda Andijon va Jalolobod shaharlarida koʻngilli politsiya otryadi safida bosmachilarga qarshi urush olib borgan. 1924-1925-yillarga kelib Sharqiy Pomir revolutsion komitet raisi, 1925—1927-yillarda Mirzachoʻl tumanida shahar-uyezd ijroi komitet raisining oʻrinbosari boʻlib ishlagan. 1917—1928-yillari Toshkentda joylashgan Oʻrta Osiyo Kommunistik universitetida oʻqigan. 1928—1930-yillarda Namanganda partiya komiteti, 1930—1932-yillarda Norin partiya komiteti, 1932—1934-yillarda Bulungʻur partiya komiteti, 1934—1936-yillarda Andijon shahrida partiya komitetining sekretari sifatida ishlagan. Shu paytlardan boshlab shahar sovetiga, uyezdi, okrugi va partiya komitetlariga aʼzo boʻlgan. OʻzKompartiya Markaziy komitetiga aʼzo boʻlib saylangan.
Islombek Arslonbekov 1935-yillarda Andijon shahridagi partiya komiteti sekretari sifatida ishlayotganida yozgan tarjimayi holida: Mening otam doim bogʻdorchilik, qishloq xoʻjaligi bilan mashgʻul boʻlgan. Hozirda 73 yosh. Ishlamaydi, mening qaramogʻimda yashaydi. 1934-yil 1-avgustdan boshlab to hozirgacha OʻzKompartiya Markaziy komitetining qaroriga koʻra Andijon shahridagi partiya komitetining birinchi sekretari boʻlib ishlayapman. 1933—1934-yillarda oʻtkazilgan partiya tozalovidan oʻtdim, tekshirilgan deb hisoblanganman, degan maʼlumotlar yozilgan. Partiya roʻyxatining kadrni hisobga olish shaxsiy varaqasida Islombek Arslonbekov toʻgʻrisida ijobiy fikrlar joy olgan. 1936-yil I.Arslonbekov Moskvaga oʻqishga joʻnatilgan. Oradan koʻp vaqt oʻtmay Moskvadan chaqirib olinadi va partiyadan oʻchiriladi. Keyinchalik ishdan olinadi. Partiyadan oʻchirilgandan keyin Samarqand tumani yer boʻlimi boshligʻi qilib tayinlanadi. 1937-yil 8-oktyabrda Samarqandda ishlayotganida qamoqqa olinadi. Toshkent turmasiga olib kelib qamoqqa tashlanadi. Ustidan tergov boshlanadi.
SSSR Oliy sudi Harbiy kollegiyasining 1938-yil 8-oktyabrdagi sayyor yigʻilishida Islombek Arslonbekov otishga hukm qilinadi. Hukm oʻsha kuni ijro etiladi.
Manbalar
uz.wikipedia.org