ILDIZOYOQLILAR

ILDIZOYOQLILAR (Rhisopoda) -sarkodalilar kenja sinfiga mansub bir hujayrali hayvonlar. Tanasining uzunligi bir necha mkm dan 3 millimetrgacha (ayrim foraminferalarda 2-3 santimetrgacha). Harakatlanish va oziqni tutish organi soxta oyoqlar, ayrim turlari va jinsiy hujayralarda xivchinlari ham bo’ladi. Bir qancha turlari (chig’anoqli amyobalar, foraminferalar) da tashqi skeleti — chig’anog’i bor. Ikkiga bo’linish, ayrim turlari jinsiy gametalar kopulyatsiyasi orqali ko’payadi. Keng tarqalgan, asosan, dengiz va chuchuk suvlarda, torfli botqoqlik va tuproqda uchraydi. Ba’zi turlari parazit. Amyobalar, chig’anoqli amyobalar, foraminferalar turkumlariga bo’linadi.

Manba

O'zbekiston Milliy Ensiklopediyasi