Grave of the Fireflies
Grave of the Fireflies (yaponcha: 火垂るの墓 Hotaru no Haka?, tarjimasi: "Yonarqoʻngʻizlar qabri") — 1967-yili yozilgan Akiyuki Nosakaning qisqa hikoyasiga asoslangan, 1988-yili yaratilgan yapon animatsion urush va tragediya filmi. Filmga Isao Takahata rejissyorlik qilgan va Studio Ghibli studiyasi tomonidan Shinchosha Publishing kompaniyasi uchun animatsiyalashtirilgan.
Filmda qahramonlarga Tsutomu Tatsumi [ja], Ayano Shiraishi [ja], Yoshiko Shinohara [ja] va Akemi Yamaguchi [ja] ovoz beradi. Umumjahon eʼtirofiga sazovor boʻlgan "Grave of the Fireflies" barcha davrlarning eng buyuk urush filmlaridan biri va yapon animatsiyasining asosiy asari sifatida tan olingan.
Mazmuni
Urush paytida yetim boʻlib qolgan Seita va Setsuko Yokokavaning ruhlari bir-biri bilan Kobe shahrida qayta uchrashadi. Ular Ikkinchi jahon urushida bombardimon qilingan Kobedan qanday omon qolganliklari haqida hikoya qilishadi.
1945-yil iyun oyida Amerikaning Boeing B-29 Superfortress bombardimonchilari guruhi Kobe shahrining katta qismini yoʻq qiladi. Seita va Setsuko portlashdan omon qolgan boʻlsalar-da, ularning onasi ogʻir yaralanib vafot etadi. Seita oʻz onasining oʻlimini Setsukodan yashiradi, keyinchalik akasi bu xabarni yashirishga urunishiga qaramay, Setsuko xabar haqida bilib oladi. Seita va Setsuko uzoqdagi xolasining oldiga koʻchib oʻtadi. Urush jadallashib, qochqinlar soni ortib borayotgani sababli Seitaning xolasi uning onasining ipak kimonosini guruch sotib olish uchun sotishga koʻndiradi. Seita onasining bankdagi pulining bir qismini kerakli narsalarni sotib olish uchun ishlatadi, lekin xolasi ularga ovqat berishni kamaytiradi va ularni ovqatga loyiq emas deb hisoblaydi.
Seita va Setsuko chidab boʻlmas haqoratdan keyin xolalasining uyini tark etadilar va ular tashlandiq bomba boshpanasiga koʻchib oʻtadilar. Ular yorugʻlik sifatida boshpanaga yonarqoʻngʻizlarni tutib, qoʻyib yuborishadi. Ertasi kuni Setsuko hasharotlar nobud boʻlganini bilib dahshatga tushadi.
Bolalarning guruchlari tugashi bilan, Seita dehqonlardan har xil poliz ekinlarini oʻgʻirlay boshlaydi va havo hujumlari paytida uylarni talon-taroj qiladi, buning uchun uni bir fermer kaltaklab, politsiyaga yuboradi. Ofitser Seita ochlik tufayli oʻgʻirlik qilayotganini tushunadi va uni qoʻyib yuboradi. Setsuko kasal boʻlib qolganda, shifokor uning ochlikdan azob chekayotganini tushuntiradi. Umidsiz Seita onasining bank hisobidagi oxirgi pulini yechib oladi. Soʻng u Yaponiya taslim boʻlganini va uning otasi, Yaponiya Imperator dengiz floti kapitani, katta ehtimol bilan vafot etganini bilib, xafa boʻladi. Seita Setsukoga ovqat olib, qaytib keladi, lekin uni jonsarak holatda koʻradi. Seita ovqat tayyorlab Setsukoni chaqirgani boshpanaga kirganida u vafot etgan boʻladi. Seita Setsukoning jasadini va uning qoʻgʻirchogʻini somon qutisiga solib yondiradi. U otasining fotosurati bilan birga singlisining kulini konfet qutisida olib yuradi.
Oʻsha sentyabr oyida Seita Sannomiya poyezd stantsiyasida boshqa och qolgan odamlar qurshovida ochlikdan vafot etadi. Amerikaliklar kelishidan oldin jasadlarni olib tashlash vazifasi yuklangan bir farrosh Seitaning konfet qutisini topib oladi va qutini dalaga uloqtiradi. Setsukoning kuli qutidan yoyilib uning ruhi Seitaning ruhi bilan koʻrishadi. Ular arvohlar poyezdiga chiqishadi va sayohat davomida Seitaning oʻlimiga olib kelgan voqealarga nazar tashlaydilar. Ularning ruhlari baxtli va sog-salomat manzilga yetib boradi. Yonarqoʻngʻizlar ularning atrofida aylanadi va aka-singil hozirgi kundagi Kobega qaraydigan tepalikdagi skameykada dam olishadi.
Ovoz bergan aktyorlar
Mukofotlar
Manbalar
Havolalar
uz.wikipedia.org