Georgiy Sumnevich
Georgiy Prokopyevich Sumnevich (1909-1947-yillarda yashab oʻtgan) — sovet botanik-sistematigi, biologiya fanlari nomzodi.
Biografiya
Georgiy Sumnevich 1909-yil 27-sentabrda Tobolsk shahrida tugʻilgan. Otasi — Prokopiy Germogenovich Sumnevich oʻrmon xoʻjaligi mutaxassisi boʻlgan va oʻgʻlida oʻsimliklarni oʻrganishga muhabbat uygʻotgan. Bolaligidan uni botanika ekskursiyalariga olib chiqgan.
1928-yildan Georgiy Tomsk davlat universitetining biologiya fakultetida tahsil olgan. 1932-yilda mazkur universitetni geobotanika mutaxassisligi boʻyicha tamomlagan.
G.P.Sumnevichning oʻqituvchilari orasida taniqli taksonomlar, professor P.N.Krilov, B.K.Shishkinlar bor edi.
Universitetni tugatgach, Georgiy Prokopyevich universitet gerbariysida qolgan va u yerda assistent sifatida ishlay boshlagan. Shuningdek, yosh olim bu yerda talabalarga oliy navdagi oʻsimliklar sistematikasidan maʼruzalar oʻqiy boshlagan.
1938-yilda G.P.Sumnevich Toshkentga koʻchib oʻtgan va Oʻzbekiston Xalq Komissarlari Soveti huzuridagi Fanlar qoʻmitasi (keyinchalik — SSSR Fanlar akademiyasi filiali, 1943-yildan — Oʻzbekiston Fanlar akademiyasi) katta ilmiy xodimi vazifasiga tayinlangan.
1939-yilda Nizomiy nomidagi Toshkent davlat pedagogika universitetida dotsent lavozimida oʻsimliklar geografiyasi va umumiy botanikadan maʼruzalar oʻqiy boshlagan.
1938-yilda Sumnevich Oʻzbekiston SSR Fanlar qoʻmitasining Chiroqchi ekspeditsiyasida qatnashgan. 1939-yilda mahalliy mevali daraxtlar va butalarni oʻrganish uchun Gʻarbiy Tyan-Shanga sayohat uyushtirgan.
Sumnevich 1947-yilda Oʻzbekiston SSR Fanlar Akademiyasining Hisor ekspeditsiyasi tarkibida Hisor tizmasining janubi-gʻarbiy qismi oʻsimliklarini oʻrganishga kirishgan.
Botanik-olim 1947-yil 10-sentabrda dala ishlari bilan shugʻullanib turgan mahalida toʻsatdan dunyodan koʻz yumgan.
Olimning baʼzi ilmiy ishlari
G. P. Sumnevich sharafiga va xotirasiga atalgan oʻsimlik turlari
Manbalar
Adabiyotlar
uz.wikipedia.org