Firuzkuhlar

Firuzkuhlar (dariycha: فیروزکوهی) — Afgʻonistonning shimoliy-gʻarbida (Gerirud va Murgʻob daryolari oraligʻida, Hirot viloyatining sharqiy qismida, shuningdek, Chahcharon yaqinida) yashovchi choraymoq guruhiga tegishli xalq.

Aholisining umumiy soni 253 000 kishini tashkil qiladi. Firuzkuhlar eʼtiqodiga koʻra, sunniy musulmonlardir. Ularning oʻz tillari yoʻq, muloqotda fors tilining shevasidan foydalanadilar (Rahimov, 1999).

Kelib chiqishi

Choraymoqlar va firuzkuhlarning etnogenezida moʻgʻul, turk va eron xalqlari ishtirok etgan. Tadqiqotchilarning taʼkidlashicha, turkiylar-moʻgʻullar taʼsirining kuchli ekanligi firuzkuhlarga xos jihat hisoblanadi.

Anʼanaviy mashgʻulotlar

Firuzkuhlar asosan chorvachilik -qoʻy, echki, tuya boqish bilan shugʻullanishadi. Firuzkuhlar kuchli va chidamli otlarni parvarish qilishlari bilan mashhurlikka erishgan. Qishloq xoʻjaligi ham rivojlangan, undagi asosiy ekinlar arpa va bugʻdoy hisoblanadi. Xalq hayotida hunarmandchilik alohida oʻrin egallaydi. Firuzkuhlar asosan, toʻquvchilik (koʻrpa-toʻshak va jun gilamlar uchun materiallar) hamda kigiz tayyorlash bilan shugʻullanishadi.

Anʼanaviy uy-joylar

Firuzkuhlar qish faslida qishloqlarda, yozda esa dumaloq toʻrtburchak shaklga ega chodirlarda yashaydilar.

Anʼanaviy kiyimlar

Joma — firuzkuhlarning anʼanaviy ust kiyimi boʻlib, uch boʻlak matodan, yenglaridan tirsakkacha tikiladi. Anʼanaviy kiyim-kechaklarga shim, qalpoq (tumalchak) va bosh kiyim ustiga tqailadigan roʻmol ham kiradi (Moshkalo, 1997).

Asosiy yeguliklar

Firuzkuhlarning taomnomasi asosan non va sutdan iborat. Shuningdek, ularning dasturxonida koʻp miqdorda mevalar ham boʻladi.

Manbalar

Adabiyotlar

uz.wikipedia.org