FINIKIY TILI — som tillarining xanaan guruhchasiga mansub va miloddan avvalgi 2—1-ming yillik — milodiy 1-ming yillikda Finikiyada hamda O’rta dengiz sohillaridagi finikiy mustamlaka manzilgohlari (Kipr, Sisiliya, Sardiniya, Messaliya, Ispaniya, Shimoliy Afrika)da tarqalgan (keyinchalik o’lik) til. Finikiy tili Finikiyaning o’zida milodiy 2-asrda iste’moldan chiqqan; shimoliy Afrikada esa so’nggi davr Finikiy tili (yangi Puna tili) arablar istilosi davri (8-asr)gacha saqlanib qolgan. Miloddan avvalgi 2-ming yillik o’rtalaridan milodiy 2-asrgacha (Finikiya) va milodiy 3-4-asrlargacha (O’rta dengizning garbi) bo’lgan davrga mansub yozma yodgorliklar orqali ma’lum; dialektal jihatdan shimoliy finikiy, Janubiy finikiy, Kipr, Puna lahjalariga bo’linadi. Finikiy tilining morfologiyasi va leksikasi boshqa som tillariniki, xususan, ivritnikiga o’xshash. Finikiy tili fonetikasining u mansub bo’lgan guruhchadagi boshqa tillardagidan o’ziga xos tomonlari bor. Umumsomiy 28 undoshdan, grafikasiga ko’ra, 22 tasi saqlanib qolgan. Vokalizm (unlilar) sohasida ham anchagina farqlar bo’lgan.
Manba
O'zbekiston Milliy Ensiklopediyasi
Loyiha rivoji uchun hayriya qiling: 9860 3501 4465 8134. @Shaka_rj Maqsad sun'iy intellekt javoblarini ko'paytirish