ELITA

---

ELITA (Fransuzcha — eng yaxshi, sara) — sotsiologiya va siyosatshunoslikdagi tushuncha. Jamiyatda boshqaruv vazifalarini bajaruvchi, fan va madaniyatni rivojlantiruvchi oliy imtiyozli ijtimoiy qatlamni anglatadi. Elita nazariyasi Platon, Karleyl, Nisshe tomonidan olg’a surilgan bo’lsa ham, qarashlar tizimi sifatida 20-asrda V. Pareto, G.Mosko, Ch.Mills va boshqalar tomonidan ta’riflab berildi. Ushbu nazariyaga ko’ra, Elita tug’ma iste’dodli odamlar orasidan paydo bo’ladi. Elitaning 5 toifasi — siyosiy, iqtisodiy, ma’muriy, harbiy va mafkuraviy Elita ajratib ko’rsatiladi. Ular bir-biriga moslashadi va totalitarizm vujudga kelishining oldi olinadi. Iqtisodiy Elitaga, jumladan, yirik biznesmenlar, sanoatning yetakchilari, moliya magnatlari kiritiladi, ular oldindan ko’ra bilish, tashabbuskorlik va ishbilarmonlik iste’dodi bo’lgan shaxslar hisoblanadi. Elita nazariyasiga ko’ra, tashabbuskor va ishchan har qanday odam, ishi yurishib ketsa, Elitaga kirishi mumkin.

Manba

---

O'zbekiston Milliy Ensiklopediyasi