DUNBULOQ

DUNBULOQ — Qirg’izistonning O’sh viloyatidagi qadimgi turar joy xarobasi (O’zgandan 5 kilometr shimolda, yassi daryosining chap sohilida). Maydoni 30×270 metr. Ichki qo’rg’onining maydoni 90×50 metr. Uch tomoni xandaq bilan o’ralgan, to’rtinchi tomoni jar. Arxeologik qazishlar natijasida Dunbuloqning qalin madaniy qatlami (10 metr atrofida) ochilgan. U 3 bosqichdan iborat. Birinchisi miloddan avvalgi 3-1-asrlarga oid, undan chiziqli och qizil naqsh solingan kulolchilik buyumlari topilgan; ikkinchisi milodning dastlabki asrlariga oid; unda sopol idishlar bilan birga bo’rtma naqsh solingan idishlar, yorg’uchoq, idish bo’yagich hamda tosh va suyakdan ishlangan zeb-ziynat buyumlari ko’p uchraydi; uchinchisi 6— 8-asrlarga oid; bu bosqichda qo’lda yasalgan va chiziqli, qabariq va kungurali naqshlar solingan idishlar tarqalgan. Dunbuloq yodgorliklari Farg’ona vodiysi qabilalarining antik va ilk o’rta davrlariga oid dehqonchilik madaniyatini aniqlashga yordam beradi.

Manba

O'zbekiston Milliy Ensiklopediyasi