DUNAYEVSKIY ISAAK OSIPOVICH

DUNAYEVSKIY ISAAK OSIPOVICH [ 1900.18(30). 1, Loxvisa, hozirgi Poltava viloyati — 1955.25.7, Moskva] — kompozitor, dirijyor, Rossiya xalq artisti (1950). Zamonaviy rus operetta hamda musiqali kinokomediya asoschilaridan, qo’shiq janrining yirik ustasi. 12 ta operetta, 3 balet, kantatalar, dramatik spektakllarga musiqalar yozgan. Ayniqsa, “Quvnoq yigit-qizlar”, “Darvozabon”, “Tsirk”, “Kapitan Grant bolalari”, “Boy kelin”, “Volga-Volga”, “Kuban kazaklari” kabi filmlar uchun yaratgan, simfonizm bilan yo’g’rilgan musiqalari va qo’shiqlari ommaviylashgan. Ijodiy uslubi kuychanlik va xatto garmoniyalari ohangdorligi, xilma-xilligi, jaz ritmlaridan unumli foydalanilganligi bilan ajralib turadi. Ommabop qo’shiq janrining yangi turlarini kashf etgan: qo’shiq — marsh (“Sport marshi”, “Entuziastlar marshi”, “Quvnoq shamol haqida qo’shiq” va boshqalar), qo’shiq — vals (“Maktab valsi”, “Vals kechasi”) va boshqalar. Dunayevskiyga bag’ishlangan “Dunayevskiy ohanglari” nomli film ishlangan (1963). O’g’li Maksim Dunayevskiy (1945, Moskva) — otasi an’analari davomchisi, “Emelyaning baxti” (1975), “Kapitan Grant bolalari” (1987) kabi myuzikllar, 30 dan ortiq filmlar (“Xayr, Meri Poppinz”, “Uch mushketyor” va boshqalar) ga esda qolarli musiqalar yaratgan.

Manba

O'zbekiston Milliy Ensiklopediyasi