DUKENTSOY

---

DUKENTSOY – Toshkent viloyati Ohangaron tumanidagi soy. Ohangaron daryosining o’ng irmog’i. Chatqol tizmasidagi Muzbel dovonining Janub yon bag’irlaridan oqib tushuvchi 60 dan ziyod irmoqning qo’shilishidan hosil bo’ladi. Yuqori oqimida (chap irmog’i — Chiltonsoy quyiladigan joygacha) Olatangi, so’ng Dukentsoy deb ataladi. Uzunligi 33 kilometr, havzasining maydoni 242 kilometr kvadrat. Dukentsoy qoryomg’ir va buloq suvlaridan to’yinadi, o’rtacha ko’p yillik suv sarfi 3,41 metr kub/ sekund, o’rtacha loyqaligi 120 gramm/metr kub. Dukentsoy yillik oqimining 70-80% mart—iyunda oqib o’tadi. Yozning 2-yarmi, kuz oylarida esa suvi 0,30 metr kub/sekundgacha kamayadi. Dukentsoydan aprel-mayda ko’pincha sel keladi, suv sarfi sekundiga 56 metr kubgacha ortadi. Qishda ko’pincha muzlaydi.

Manba

---

O'zbekiston Milliy Ensiklopediyasi