DOLCHIN

DOLCHIN, dorchin (Cinnamomum Cassia Blume) — lavrdoshlar oilasiga mansub daraxt. Janubiy Xitoy, Vetnam, Laos, Shri Lanka, Indoneziya (Yava, Sumatra) va Lotin Amerikasida ekiladi. Doim yashil o’simlik. Bargi qalin, guli mayda. Yosh daraxtining po’stlog’ini quritib, dolchin tayyorlanadi. Dolchin tarkibida 75-90% dolchin aldegidi, 1 — 2% efir moyi, 2-3% oshlovchi moddalar, 1,35% kaltsiy oksalat va tsiamanin borligi aniqlangan. Oziq-ovqat sanoatida ziravor sifatida, farmasevtikada va atir-upa ishlab chiqarishda (dolchin moyi) ishlatiladi.

Manba

O'zbekiston Milliy Ensiklopediyasi