DEMAGIN VLADIMIR VASILEVICH

DEMAGIN VLADIMIR VASILEVICH (1924.15.7, Toshkent) — uchuvchi, “xizmat ko’rsatgan sinovchi-shturman” (1967). Sinovchi-uchuvchilar maktabini tugatgan (1952). Mehnat faoliyatini Toshkentdagi V. P. Chkalov nomidagi aviasiya zavodida yig’uvchi-parchinlovchilikdan boshlagan (1941-42). 2-jahon urushi qatnashchisi (1942-44). Xarkov harbiy aviasiya bilim yurtida (1944), Jukovskiy (Moskva viloyati) sinovchi-uchuvchilar maktabida (1952) o’qigan. Toshkent aviatsiya zavodi (hozirgi Toshkent aviatsiya ishlab chiqarish birlashmasi) uchish-sinov stansiyasida bortradist (1945-49), sinovchi-shturman (1949-80), Qidiruv-qutqaruv xizmati boshlig’i (1980-84), navbatchi shturman (1984-92). Toshkent aviatsiya zavodida ishlab chiqarilgan li-2, An-8, an-12, an-22, il-12 va il-76 (turli modifikasiyalari) samolyotlarini sinashda qatnashdi, havodagi parvozi 4 million kilometrdan ortiq (13000 soat). Ko’plab shturman shogirdlar tayyorlagan. “Jasorat”, “Shuhrat” (1994) medallari bilan taqdirlangan.

Manba

O'zbekiston Milliy Ensiklopediyasi