DELAVER

---

DELAVER — AQSh shtati. Mamlakatning Atlantika okeani sohilida, Delmarva yarim orolining Sharqiy qismida joylashgan. Maydoni 5,3 ming kilometr kvadrat. Aholisi 796,1 ming kishi (2001). Ma’muriy markazi — Dover shahri. Relefi tekisliklardan iborat, botqoqliklar uchraydi. Iqlimi dengiz iqlimi, daryolari qisqa va sersuv. Keng bargli o’rmon bor. Delaver — industrial-agrar shtat, xo’jaligining asosini sanoat tashkil etadi. Ayniqsa kimyo sanoati rivojlangan (AQShning yirik kimyo zavodlari shu shtatda). Kemasozlik, avtomobilsozlik, stanoksozlik, rezina, oziq-ovqat, to’qimachilik sanoati, yuqori sifatli po’lat ishlab chiqarish, metallsozlik muhim ahamiyatga ega. Yirik sanoat shahri va porti — Uilmington. Shahar atrofida intensiv qishloq xo’jalik (parrandachilik, sut chorvachiligi, sabzavotchilik) rivojlangan. Delaver — AQShning ilk bor (1776 yilda) tashkil topgan shtatlaridan. Shtat hududida yevropaliklar ko’chib kelgunga qadar indeyslarning delavar qabilasi yashagan. 1664 yilda inglizlar tomonidan bosib olingan.

Manba

---

O'zbekiston Milliy Ensiklopediyasi