BOTQALDOQLAR

---

BOTQALDOQLAR, sho’ng’uvchi o’rdaklar (Aythya) — g’ozsimonlar turkumining o’rdaklar kenja oilasiga mansub qushlar urug’i. Orqa barmoqlari orasida keng teri pardalari bo’lishi bilan boshqa o’rdaklardan farq qiladi. Botqaldoqlar yaxshi uchadi, suzadi va sho’ng’iydi, suv tagidan o’lja tutadi. Shuning uchun ularga “botqaldoq” yoki “sho’ng’uvchy o’rdaklar” degan nom berilgan. Botqaldoqlar uyasini yirik va chuqur ko’llar sohilidagi qamish va qoyalar orasiga quradi. 7-12 ta tuxum qo’yadi. Suv o’simliklarining ildizi, barg va urug’lari, mollyuska, qisqichbaqasimonlar va suv hasharotlari bilan oziqlanadi. Botqaldoqlarning go’shti, pati va terisidan foydalaniladi. O’zbekistonda ko’kbel Botqaldoqlar (Aytya Kegta), olaqanot Botqaldoqlar (Aythya nyroca), haydarkokil Botqaldoqlar (Aythya fuli gula) kabi turlari uchraydi.

Manba

---

O'zbekiston Milliy Ensiklopediyasi