BO’STONBUVA MAQBARASI

BO’STONBUVA MAQBARASI — Farg’ona viloyati Buvayda tumanidagi me’moriy yodgorlik (15-16-asrlar). Xalq orasida Bo’stonbuva nomi bilan mashhur bo’lgan, 9-asrda yashab o’tgan tasavvufchi shayxlardan biri Sulton Boyazid Bistomiy dafn qilingan deb taxmin qilinadi (Alisher Navoiy “Nasoyim ulmuhabbat” asarida va 18-asrda yaratilgan “Tazkirat ulavliyon turkin”da shayxga yuqori baho berilgan). Maqbara pishiq g’ishtdan gumbazli qilib qurilgan. Chortoq tarhli ziyoratxona va murabba tarhli go’rxonadan iborat (15×7,2 metr). Peshtoqida ko’p qirrali yulduzsimon va aylana shaklidagi uymakori bezaklar saqlangan. Peshtoqining ikki yonidagi guldastalar binoga mahobat baxsh etgan.

Manba

O'zbekiston Milliy Ensiklopediyasi