BOLTATUMSHUQ

---

BOLTATUMSHUQ (Coccothrauster coccothrauster) — chumchuqsimonlar turkumining targ’ilboshlilar oilasiga mansub sayroqi qush. Yevropa va Osiyoning o’rta mintaqalarida tarqalgan. Qishlash uchun Janubga — Qora dengiz atrofi va Sharqiy Xitoyga uchib ketadi. Afg’oniston, Pokiston va shimoliy G’arbiy Hindistonda o’troq yashaydi. O’zbekistonda Hisor Olay tog’larida uchraydi. O’rmon va bog’larda yashaydi. Tumshug’i katta va baquvvat, meva danaklarini chaqishga yaxshi moslashgan. Uyasini daraxtga quradi. 4-5 ta tuxum qo’yadi. Tuxumini urg’ochisi bosadi. Erkagi unga oziq tashiydi. Bolasi 14 kunda tuxumdan chiqadi, yana 11-14 kundan so’ng uchirma bo’ladi. O’zbekiston tog’laridagi archazorlarda archa boltatumshug’i (Mycerobas carpiers) uchraydi. Har xil mevalar, o’simliklar urug’i va don bilan oziqlanadi.

Manba

---

O'zbekiston Milliy Ensiklopediyasi