BOA
BOA, oddiy bo’g’ma ilon (Constrictor constrictor) — bo’g’ma ilonlar oilasiga mansub ilon. Uzunligi 2-5,5 metr. Terisining rangi chiroyli naqshindor yaraqlagan. Amerikaning asosan tropik o’rmonlari, tog’li hududlarida (imperator bo’g’ma iloni — S. s. imperator kenja turi) va quruq ochiq landshaftlarida (Argentina bo’g’ma iloni — S. s. occidentalis kenja turi) tarqalgan. Ko’pincha yerda, daryo va soylar qirg’og’ida, daraxtlarda yashaydi. Odamlar yashaydigan joylar yaqinida ham uchraydi. Kemiruvchilar, kaltakesaklar va qushlar bilan oziqlanadi. Asosan kechasi ovga chiqadi. Urg’ochisi 3 tadan 64 tagacha bolalaydi. Yosh Boa ko’lga o’rganadi, tutqinlikda 10 va undan ko’proq yil yashaydi. Boa terisi juda yuqori baholanadi, undan ko’nteri sanoatida foydalaniladi.
Manba
O'zbekiston Milliy Ensiklopediyasi
Uzpedia.uz