BIHISHTI

BIHISHTI, behishti—o’rtapishar vinobop uzum navi. Vatani—O’rta Osiyo. Sharqiy navlar ekologik-geografik guruhiga kiradi. O’zbekistonda rayonlashtirilgan. Tupining o’sishi o’rtacha, bargi to’garak yoki tuxumsimon, uch bo’lakchali. Guli ikki jinsli. Uzum boshi katta (bo’yi 20-30 santimetr, eni 8— 12 santimetr), tsilindrkonussimon, og’irligi 200— 250 gramm. G’ujumi dumaloq, sarg’ish-yashil yoki och qahrabo rangda, sershira, xushta’m, po’sti qalinroq, yupqa g’ubor bilan qoplangan. Faol harorat yig’indisi 3000-3500° bo’lganda 150 kunda pishadi (sentabr oxiri). Tarkibida 18-20% qand bor. Hosildorligi 180-200 tsentner/gektar. Bu nav issiq va quruq iqlimli, sho’rlangan va sernam yerlarda mo’l hosil beradi. Novdalarini uzun qoldirib kesib, tupiga elpig’ichsimon shakl beriladi. Buxoro viloyatida keng tarqalgan. Bihishtidan vino hamda sharbatlar tayyorlanadi.

Manba

O'zbekiston Milliy Ensiklopediyasi