BELGOROD-DNESTROVSKIY

BELGOROD-DNESTROVSKIY (1918 yilgacha va 1940 — 44 yillarda Akkerman) — Ukrainaning Odessa viloyatidagi shahar. Dnestr limanidagi port, qora dengizdan 20 kilometr. Temir yo’l stantsiyasi. Aholisi 57 ming kishi (1999). Belgorod-Dnestrovskiy yunonlarning qadimgi Tira shahri o’rnida 9-asrda vujudga kelgan. 14-asrda mo’g’ullar egallagan va shaharni oq-Libo deb atagan. 14-asrda genuyaliklarning Monkastro koloniyasi, 15-asrda Moldaviya knyazligi tarkibida bo’lib Chetatyaalba deb atalgan, 1484 yildan turklarga qarashli qal’a, 1812 yilda Rossiya imperiyasiga qo’shib olingan, 1918 — 40 yillarda Ruminiya tarkibida (Chetatyaalbe) bo’lgan. Belgorod-Dnestrovskiyda go’sht-sut, baliq-konserva. uzum vinosi, un, tibbiy buyumlar, tibbiy asboblar zavodlari, karton, mebel, tikuvchilik fabrikalari, qurilish materiallari kombinati, baliq sanoati texnikumi, qishloq xo’jalik texnikumi, tibbiyot va pedagogika bilim yurtlari, o’lkashunoslik muzeyi bor.

Manba

O'zbekiston Milliy Ensiklopediyasi