BANGI

---

BANGI — Markaziy Afrika Reslublikasi poytaxti, mamlakatning eng yirik shahri. Ubangi daryosidagi port. Aeroporti xalqaro ahamiyatga ega. Aholisi 600 ming kishi (1995). Bangi frantsuz mustamlakachilarining harbiy istehkomi (1894) bo’lgan. Bangi dastlab Ubangi-shari hududining ma’muriy markazi (1958 — 60 yillarda Muxtor Markaziy Afrika Respublikasining poytaxti). Mamlakatning asosiy savdo va sanoat markazi, to’qimachilik, oziq-ovqat, metallsozlik, taxta tilish sanoati korxonalari mavjud; avtomobil yo’llari tuguni. San’at va hunarmandchilik milliy markazi. Shahar markazida zamonaviy binolar qurilgan, chekkalarida esa mahalliy kulbalar saqlangan. Geofizika stansiyasi, kinoteatrlar, universitet va muzeylar bor. Bangiga 1889 yilda asos solingan.

Manba

---

O'zbekiston Milliy Ensiklopediyasi