APELLYATSIYA

APELLYATSIYA (lotincha appellatio — murojaat qilish; shikoyat qilish; norozilik bildirish) — sud hukmi ustidan shikoyat arizasi berishning bir shakli. Apellyatsiya Frantsiya jinoyat-protsessual kodeksiga (1808 yil), jahonning boshqa ko’pchilik davlatlari jinoyat-prosessual qonunlariga kiritilgan. O’zbekiston Respublikasida 1994 yil 22 sentabrda qabul qilingan va 1995 yil 1 apreldan amalga kiritilgan Jinoyat-protsessual kodeksida ushbu tartib ko’rsatilmagan, ammo Apellyatsiya tartibida ish ko’rishning ayrim aniq masalalariga oid qismlari yangi JPKning 490-moddasida nazarda tutilgan qoidaga ko’ra, Apellyatsiya kassatsiya instantsiyasida ish ko’radigan sudda qo’llaniladi. Sud hukmi ustidan Apellyatsiya tartibida shikoyat berish yo’l qo’yilgan davlatlarning jinoyat-protsessual qonunida Apellyatsiya tushunchasi 2-bosqich sudida jinoyat ishini mazmunan hal qilish uchun yangidan ko’rish mumkinligini bildiradi. Apellyatsiya sudi (2-bosqich sudi) hukmning qonuniyligi va asosligini faqat shikoyat (protest)da ko’rsatilgan holatlar bo’yicha tekshiradi. Apellyatsiya sudi ishdagi yozma materiallarga tayanib, o’z qarorini qabul qiladi. Bu sudda 1-instantsiya sudida so’roq qilingan guvohlar takroran so’roq qilinmaydi, dalillarni bevosita va og’zaki tekshirish, sud ishlarini yuritishdagi tortishuv, mahkumni himoya huquqi bilan ta’minlash va ishni uzoq muddat davomida ko’rishdek holatlar chegaralanadi.

Manba

O'zbekiston Milliy Ensiklopediyasi